Saturday, June 28, 2014
១នាទីស្វែងយល់អំពីសំឡេងប្រជាពលរដ្ឋ និងប្រព័ន្ធឆ្លើយតបជាសំឡេង
ថ្ងៃទី៣០ ខែមិថុនា ឆ្នាំ២០១៤ មជ្ឈមណ្ឌលអប់រំច្បាប់សម្រាប់សហគមន៍ប្រកាសបើកដំណើរការគេហទំព័រថ្មីរបស់ខ្លួនដែលមានឈ្មោះថា “សម្លេងប្រជាពលរដ្ឋ”។
គេហទំព័រ “សំឡេងប្រជាពលរដ្ឋ" ជាវេទិកាលើប្រព័ន្ធអ៊ីនធើណិត សម្រាប់លើកកម្ពស់សិទ្ធិសេរីភាពនៃការបញ្ចេញមតិ និងសិទ្ធិសេរីភាពនៃការផ្ដល់និងទទួលព័ត៌មាននៅព្រះរាជាណាចក្រកម្ពុជា។
គេហទំព័រនេះកត់ត្រាបណ្ដឹងឬដំណឹងពីប្រជាសហគមន៍នានាដែលប្រឈមហានិភ័យផ្សេងៗ ដោយភ្ជាប់ទៅអ្នកកាសែតនិងសហគមន៍ដែលជាអ្នកប្រមូលនិងចែករំលែកព្រឹត្តិការណ៍នានា និងដំណឹងថ្មីៗទាន់ហេតុការណ៍ផ្សេងៗ។
តាមរយៈការប្រើប្រព័ន្ធសារ ”ឆ្លើយតបជាសំឡេង" ដែលជាប្រព័ន្ធថ្មីរបស់យើង ប្រជាសហគមន៍ និងប្រជាជនសាមញ្ញនៅគ្រប់កន្លែងក្នុងប្រទេសកម្ពុជា អាចទូរសព្ទចូលមកការិយាល័យកណ្ដាលរបស់យើង ដើម្បីទទួលការពិគ្រោះយោបល់ពីអ្នកជំនាញផ្នែកច្បាប់ ការអប់រំច្បាប់ និងទទួលដំណឹងថ្មីៗបំផុតអំពីព្រឹត្តិការណ៍នៅតាមសហគមន៍នានា។
លោកអ្នកក៏អាចផ្ញើសារជាសំឡេងអំពីព្រឹត្តិការណ៍ណាមួយ មកកាន់ការិយាល័យកណ្ដាលរបស់យើងបានដែរ។
សារជាសំឡេងដែលលោកអ្នកផ្ញើមកនោះ នឹងត្រូវបានពិនិត្យមើលយ៉ាងល្អិតល្អន់មុននឹងផ្សព្វផ្សាយនៅលើគេហទំព័រ “សំឡេងប្រជាពលរដ្ឋ”។ ក្រោយពីបានប្រកាសផ្សព្វផ្សាយ អ្នកផ្សេងទៀតអាចផ្ដល់មតិរបស់ខ្លួនចំពោះព័ត៌មាននៅគេហទំព័រនោះបាន។ សូមចូលមើលគេហទំព័រ “សំឡេងប្រជាពលរដ្ឋ” តាមអាសយដ្ឋាននេះ៖ http://www.vopkh.net។
ផ្ញើរបាយការណ៍ ឬដំណឹងមកកាន់យើងខ្ញុំ ដោយទូរស័ព្ទមកលេខ ០៧០ ២២១ ១០២។ លោកអ្នកអាចហៅមក២៤ម៉ោងក្នុង១ថ្ងៃនិង៧ថ្ងៃក្នុងមួយសប្ដាហ៍ (២៤/៧)។
គេហទំព័រ “សំឡេងប្រជាពលរដ្ឋ"នៃមជ្ឈមណ្ឌលអប់រំច្បាប់សម្រាប់សហគមន៍ទទួលបានការគាំទ្រពីសហភាពអឺរ៉ុបដោយផ្ដោតលើផ្នែកមួយរបស់ខ្លួនគឺគម្រោង “សិទ្ធិមនុស្សក្នុងសម័យបច្ចេកវិទ្យាកុំព្យូទ័រ៖ការការពារសុវត្ថិភាពសារនិងអ្នកផ្ញើសារ"។ គម្រោងនេះ សហភាពអឺរ៉ុបផ្ដល់មូលនិធិគាំទ្រជិត ១៨៥.០៩៧,០០អឺរ៉ូសម្រាប់រយៈពេល២ឆ្នាំ ដើម្បីការពារ ក្រុមអ្នកការពារសិទ្ធិមនុស្សនៅកម្ពុជា។
Subscribe to:
Post Comments (Atom)
No comments:
Post a Comment