អ្នកភូមិឡពាងមិនជឿរជាក់លើការសន្យារបស់តំណាងរាស្ត្រគណបក្សប្រជាជន

ភ្នំពេញ៖នៅព្រឹកថ្ងៃទី២១ ខែសីហា ឆ្នាំ២០១៤នេះ អ្នកស្រី អ៊ំ សុភីដែលជា តំណាងរបស់ប្រជាពលរដ្ឋរងគ្រោះអ្នកឡពាង្គ បានមានប្រសាសន៍ថា គាត់មិនមានការជឿជាក់ចំពោះតំណាងរាស្ត្រគឺលោកស្រី កែ ចន្ទមុនីឡើយ ព្រោះបញ្ហាដែលបានកើតមានឡើងគឺអស់រយៈកាល១០ជិតហើយ មិនមានការដោះស្រាយណាមួយជូនចំពោះប្រជាពលរដ្ឋទេ គឺមានតែការចាប់
ប្រជាពលរដ្ឋដាក់គុក ក្នុងនោះក៏មានប្តី និងម្តាយក្មេករបស់គាត់ផងដែរ។
 អ្នកស្រីនិយាយបែបនេះគឺ បន្ទាប់ពីតំណាងរាស្ត្រមកពីគណបក្សប្រជាជនកម្ពុជា 
ប្រចាំខេត្តកំពង់ឆ្នាំងគឺ លោកស្រី កែ ចន្ទមុនី បានមកចុះជួបប្រជាពលរដ្ឋរង គ្រោះឡពាង្គដែលកំពុងស្នាក់នៅបណ្ដោះអាសន្នក្នុងផ្ទះសហគមន៍បឹងកក់។ ហើយគោលបំណងដែលលោកស្រី កែ ចន្ទមុនី មកជួយដោះស្រាយនោះគឺ គ្រាន់តែចង់បាននូវសំណូមពរដែលប្រជាពលរដ្ឋចង់បានតែប៉ុណ្ណោះ ចំពោះលទ្ធផលយ៉ាងណានោះគឺលោកស្រីមិនបានសន្យាថា ជួយដោះស្រាយឱ្យ
ទាល់តែបាននោះទេ។ ជាមួយគ្នានេះ លោកស្រីតំណាងរាស្ត្រ ក៏បានស្នើរទៅប្រជាពលរដ្ឋឱ្យត្រលប់ទៅខេត្តកំពង់ឆ្នាំងវិញ ដើម្បីស្វែងរក
ដំណោះស្រាយ តែប្រជាពលរដ្ឋគឺគាត់មិនព្រមទៅតាមការស្នើសុំនេះទេ
ហើយគាត់បានបន្ថែមទៀតថា បើសិនជាមិនមានដំណោះស្រាយណាមួយនោះទេ គឺពួកគាត់នឹងមិនត្រលប់ទៅខេត្តកំពង់ឆ្នាំងវិញជាដាច់ខាត។ ចំពោះការស្នើសុំរបស់ប្រជាពលរដ្ឋវិញគឺមានបីចំនុចគឺ ទី១.ស្នើឱ្យមានការដោះលែងតំណាងប្រជាពលរដ្ឋ៥នាក់ ទី២.ស្នើឱ្យការដោះស្រាយបញ្ហាដីធ្លីរបស់ពួកគាត់ឱ្យបានឆាប់រហ័ស និងទី៣. ស្នើឱ្យក្រុមហ៊ុនបញ្ឈប់ការធ្វើរបង និងដកកងកម្លាំងប្រដាប់អាវុធចេញពីទីនោះឱ្យអស់។
សូមបញ្ជាក់ថាៈ នៅថ្ងៃស្អែកនេះ ប្រជាពលរដ្ឋរងគ្រោះឡពាង្គនឹងធ្វើការដាក់ញត្តិជូនលោក នាយករដ្ឋមន្រ្តីហ៊ុន សែន។

លោកស្រី កែ ចន្ទមុនីតំណាងគណបក្សប្រជាជនជួបអ្នកភូមិឡពាង