វគ្គបណ្តុះបណ្កាលស្តីពីបណ្តាញទំនាក់ទំនងសង្គមនេះមានការចាប់អារម្មណ៍ពីសំណាក់អ្នកចូលរូមយ៉ាងខ្លាំង ព្រោះពួកគេយល់ថា សម័យនេះ ជាសម័យបច្ចេកវិទ្យា (តិចណូឡូជី) គឺគេប្រើប្រព័ន្ធអ៊ីនធើណិតបណ្តាញសង្គមសម្រាប់ទំនាក់ទំនងគ្នា ទាំងការងារ ទាំងការសិក្សា និងការប្រកបរបរអាជីវកម្មជាដើម។
និស្សិតអក្សរសាស្ត្រខ្មែរមកពីសាកលវិទ្យាល័យភូមិន្ធភ្នំពេញ កញ្ញា នាក់ ខេមា បានមានចំណាប់អារម្មណ៍ថា ហ្វេសប៊ុក (Facebook) ធ្វើឲ្យកញ្ញាស្គាស់មិត្តរឹតតែច្រើនជាងមុន អាចទទួលបានព័ត៌មានដែលកញ្ញាមិនធ្លាប់បានដឹង ហើយអ្វីដែលសំខាន់ទៅទៀតនោះ គឺព័ត៌មានស្តីពីអាហាររូបករណ៍ទៅសិក្សានៅបរទេសដែលវាជារឿងដែលសំខាន់សម្រាប់និស្សិតដូចជាកញ្ញា។ខេមា បានបន្តថា កញ្ញាចង់ស្វែងយល់ព័ត៌មានមួយចំនួនដែលទាក់ទងនឹងសង្គមកម្ពុជា ដែលកញ្ញាមិនបានដឹង។
ចំណែកឯនិស្សិតច្បាប់នៃសាកលវិទ្យាល័យភូមិន្ទនីតិសាស្រ្ត និងវិទ្យាសាស្ត្រ សេដ្ឋកិច្ច លោក ឡុង ឈុនហៃ មានប្រសាសន៍ថា វាពិតជាមានសារសំខាន់ណាស់ ព្រោះយើងបានស្វែងយល់ពីការប្រើប្រាស់ប្រព័ន្ធអ៊ីនធឺណេត ស្វែងយល់ពីការវិវត្តផ្សេងៗរបស់សង្គមកម្ពុជា។
ឈុនហៃ ក៏បានឡើងថា គឺជាបណ្តាញសង្គមមួយដែលពេញនិយម និងមានសារសំខាន់ ដោយហេតុថា ទាំងយុវជន ក៏ដូចជាប្រជាពលរដ្ឋ អាចទទួលបានព័ត៌មានយ៉ាងងាយស្រួលដោយគ្រាន់តែមានប្រព័ន្ធអ៊ីនធឺណេត និងចេះប្រើប្រាស់បណ្តាញសង្គម ប៉ុន្តែ ឈុនហៃ ក៏បានបញ្ជាក់ផងដែរថា រាល់ព័ត៌មានទាំងអស់នៅក្នុង បណ្តាញសង្គម មិនមែនសុទ្ធតែពិតទាំងអស់នោះទេ គឺទាមទារឲ្យអ្នកប្រើបណ្តាញសង្គមមួយនេះចេះវិភាគនិងស្វែងរកប្រភពព័ត៌មានដែលអាចទុកចិត្តនិងជឿជាក់។
លោក សន ចាន់រដ្ឋា ជាមន្ត្រីព័ត៌មាននិងផ្សព្វផ្សាយរបស់បណ្តាញយុវជនកម្ពុជា និងជាគ្រូបង្គោល បានមានប្រសាសន៍ថា គោលបំនងសំខាន់ គឺចង់ឲ្យសិក្ខាកាមទាំងអស់យកចំណេះដឹងដែលទទួលបាននៅក្នុង វគ្គបណ្តុះបណ្តាលនេះទៅប្រើប្រាស់នៅក្នុងការសិក្សាស្រាវជ្រាវរបស់ពួកគេ និងអ្វីដែលពិសេសនោះ ពួកគេជាផ្នែកមួយនៃការចែករំលែកព័ត៌មាននៅក្នុងប្រទេសកម្ពុជា។
លោកក៏មានសង្ឃឹមដែរថា នៅថ្ងៃខាងមុខ ការប្រើប្រាស់បណ្តាញសង្គម នឹងមានការរីកចម្រើន ព្រោះវាជាប្រភពផ្ដល់ព័ត៌មានមួយដែលអាចជឿជាក់ ទោះបីជា មានព័ត៌មានមួយចំនួនមិនពិតក៏ដោយ។ សិក្ខាកាមទាំងអស់ក៏បានសំណូមពរទៅដល់យុវជនផ្សេងៗទៀត ឲ្យចូលរួមចែករំលែកព័ត៌មានដែលពិត និងព្យាយាមស្វែងយល់ឲ្យបានច្រើនអំពីបញ្ហារបស់សង្គមជាតិ៕
No comments:
Post a Comment